ലീലാവതാരൈഃ ആയുരാരോഗ്യ സൌഖ്യം
ഹെല്ത്ത് ഈസ് വെല്ത്ത്
.......................................
ആരോഗ്യം ആണ് സമ്പത്ത് എന്നു ആംഗല പഴമൊഴി. ആരോഗ്യം ഇല്ലാത്ത അവസ്ഥയില് നമ്മള് രോഗികള് അസുഖക്കാര്. ഒന്നു നമുക്ക് ചുറ്റും നോക്കിയാല്, പണ്ടൊക്കെ, എത്ര മഴ കൊണ്ടാലും ഒരു ചുക്കും സഭവിക്കില്ല്യാ, ഇപ്പൊഴൊ? ടി വിയില് ഒക്കെ കാണിക്കുന്ന വിക്സ്ന്റെ ആഡ് പോലേ തന്നെ നമ്മുടേം അവസ്ഥ.അതവിടെ നിക്കട്ടെ, നല്ല അസുഖം എന്നു ഒന്നുണ്ടോ. ചിലപ്പോഴെങ്കിലും, മുട്ടില് പനി നമുക്കൊക്കെ അനുഗ്രഹം ആകാറുണ്ട്, പ്രത്യേകിച്ചു, ജി എമ്മിന്റെ ദുര്മോന്ത കാണണ്ടാത്ത ദിവസം, ഒരു പനി വന്നാല് മതിയായിരുന്നു എന്ന് ചിന്തിക്കാത്തവര് കുറവ്. എന്നാല് പോലും ശെരിക്കു പനിവന്നാലോ പിന്നെ നമ്മളേക്കാള് കഷ്ടപ്പെടുന്നവര് ലോകത്തില് ഇല്ലാ എന്നുള്ള മട്ടാ ( എന്റെ കാര്യം ആണ് ഉദാ:).
ഇതൊക്കെ നമ്മുടെ കാര്യം. ആഴ്വാര്ക്ക് അസുഖം വന്നപ്പോഴോ.
തീര്പ്പാറയാമിനീ (തിരുവായ്മൊഴി 4-6-1)
രംഗം: നമ്മാഴ്വാര് നായികാ ഭാവത്തോടെ, ഭഗവദ് അനുഭവത്തില് നിന്നുള്ള വിരഹം താങ്ങാന് ആവാതെയും, ഈശ്വരനില് തന്നെ മനസ്സു അര്പ്പിച്ചുകൊണ്ട് ബോധം നഷ്ടപ്പെട്ടു കിടക്കുന്നു, ആഴ്വാരുടെ അമ്മ എന്തു ചെയ്യണം എന്നറിയാതെ വിഷമിച്ചു നില്ക്കുമ്പോ, കട്ടുവിച്ചി (സൂത്ത് ടെല്ലര്) വരുന്നു, അവള് പറയുന്നു, ഇതു ബാധ കൂടിയതാണ് ഞാന് ശെരിയാക്കിത്തരാം, കള്ളും ഇറച്ചിയും കൊണ്ടുവാ. കട്ടുവിച്ചി പണ്ടുകാലത്തെ വ്യാജന് ആണെന്നു തോന്നുന്നു. അപ്പോഴേക്കും ആണ് തോഴിയുടെ രംഗപ്രവേശം, അവള് ആണ് പരാങ്കുശ നായകി (ആഴ്വാരുടെ നായികാഭാവത്തിനെ തമിഴ് സംഘകാലം ഇങ്ങനെയാണ് വിശേഷിപ്പിക്കുന്നത്) യഥാര്ത്ഥമായി അറിയുന്നവള്. തോഴി പ്രവേശിച്ചിട്ടു പറഞ്ഞു
"തീര്പാറൈയാമിനി എങ്കനം നാടുതും അന്നൈമീര്
ഓര്പ്പാല് ഇവ്വെണ്ണുതല് ഉത്ത നന്നോയ് ഇതു തേറിനോം"
(അമ്മമാരേ വിഷമിക്കണ്ട, ഇതു ശരീരത്തേ ബാധിച്ച അസുഖം അല്ല, ഏതൊരു ജീവാത്മാവിനും അവശ്യം ഉണ്ടാകണ്ട അസുഖം ആണ് ബാധയൊന്നുമല്ല, ഇതു എന്താണന്നോ ബ്രഹ്മ ജ്ഞാനം മൂലം, മോക്ഷത്തിനു കൊതിക്കുന്ന ഒരു ജീവാത്മാവിന് ഉണ്ടാകേണ്ട ജ്ഞാന അവസ്ഥയാണ് )
"നന്നോയ്" നല്ല അസുഖം എന്ന് അവിടെ വിശേഷിപ്പിക്കുന്നു.അതേ പോലേ "തേറീനോം" ഈ നല്ല അസുഖം വന്നതു കൊണ്ട് അവള് രക്ഷപെട്ടു എന്നും വിശേഷിപ്പിക്കുന്നു.
ഈ പാട്ടിനെ "സഖീ വെറി വിലക്കി", എന്നു വിശേഷിപ്പിച്ച വ്യാഖ്യാതാവായ നമ്പിള്ളൈ, ഈടു മുപ്പത്താറായിരപ്പടി വ്യാഖ്യാനത്തില് ഇങ്ങനെ വിശേഷിപ്പിച്ചു,
"കൈക്കൂലി കൊടുത്തു കൊള്ള വേണ്ടും നോയ്"
ഇങ്ങനത്തെ അസുഖം കൈക്കൂലി കൊടുത്തു വാങ്ങേണ്ടി വരും എന്ന് വെറുതേ അല്ല
പൂന്താനം പാടിയത്
കൊതിച്ചീടുന്ന ബ്രഹ്മത്തെ കണ്ടിട്ടു
കുതിച്ചീടുന്നു ജീവനും അപ്പോഴേ ..
ആഴ്വാര്ക്ക് ഈ അസുഖം (ബ്രഹ്മ ജ്ഞാനം) ഉണ്ടായതിനു കാരണക്കാരന് ആരാണ് ഇതൊക്കെ നീ എങ്ങനെ അറിഞ്ഞു എന്നായി അമ്മയുടെ അടുത്ത ചോദ്യം. തോഴി മറുപടി ഇങ്ങനെ കൊടുത്തു
"അന്തി മത്തോരുപായം എന്
ഇതന് അന്തന് തുഴായ് കമഴ്തല്
കുട്ടനാട്ടു തിരുപ്പുലിയൂര് നിന്റ്ര മായപ്പിരാന്
തന് തിരുവരുളാം ഇവള് നേര് പട്ടതേ"
ഞാനും കുറേ ഒക്കെ ആലോചിച്ചു നോക്കി, അവളെ അടുത്തു ചെന്നു നിരീക്ഷിച്ചു, അവളുടെ ശരീരത്തില് നിന്നും തുളസിയുടെ മണം മാത്രമേ വരുന്നുള്ളൂ, അപ്പോഴേ ഞാന് തീര്ച്ചയാക്കി കുട്ടനാട്ടില് ഉള്ള തിരുപ്പുലിയൂരിലെ മായപ്പിരാന് ആണ് ഈരോഗത്തിനു കാരണം എന്ന്. (തിരുവല്ലായ്ക്ക് അടുത്താണ് പുലിയൂര് മഹാവിഷ്ണു ക്ഷേത്രം)
അങ്ങനെ നമുക്കും എന്നെങ്കിലും നല്ല അസുഖം ഉണ്ടാവുമോ ആവോ??
ഗുരുപവനപുരേ ഹന്ത! ഭാഗ്യം ജനാനാം